அண்டார்டிகாவில் மிகப்பெரிய பனிப்பாறை உடைந்தது!

July 13, 2017

அண்டார்டிகாவின் மேற்கில் இருந்து மிகப்பெரிய அளவிலான பனிப்பாறை உடைந்து தனியாகப் பிரிந்து சென்றுள்ளது.

இதுவரை பிரிந்து சென்ற மிகப்பெரிய பனிப்பாறைகளில் இதுவும் ஒன்றாகும்.

இதன் சுற்றளவு 5,800 சதுர கிலோமீட்டர்களாகும். எடை சுமார் ட்ரில்லியன் டன் வரை இருக்கக்கூடும் என்று கணிக்கப்பட்டுள்ளது.

இதனால் அண்டார்டிகாவின் மேற்குப் பகுதியான ”லார்சன் C” என்ற பனி அடுக்கு 12 சதவீதம் அளவிற்கு குறைந்துவிட்டது.

இந்த பனிப்பாறையை ஜரோப்பிய செயற்கைக்கோள்களின் மூலமாக அறிவியலாளர்கள் கடந்த சில தினங்களாக தீவிரமாகக் கண்காணித்து வந்தனர்.

இதனிடையே, கடந்த 10 ஆம் திகதியிலிருந்து 12 ஆம் திகதிக்குள்ளாக இந்த பனிப்பாறை உடைந்து தனியாக பிரிந்து சென்றுள்ளது.

இது சமீபகாலங்களில் ஏற்பட்ட மிகப்பெரிய பனிப்பாறை வெடிப்பாகும்.

இந்த உடைந்த பகுதிக்கு ஏ 68 என்று அறிவியலாளர்கள் பெயரிட்டுள்ளதுடன், தொடர்ந்து கண்காணித்து வருகின்றனர்.

இந்நிலையில், வடக்கு திசை வழியாகப் பயணிக்கும் கப்பல்கள் சற்று கவனத்துடன் இருக்க வேண்டும் என அறிவிக்கப்பட்டுள்ளது.

கடந்த 1995 ஆம் ஆண்டிலும், 2002 ஆம் ஆண்டிலும் இதேபோல லார்சன் A மற்றும் B பனி அடுக்குகளிலிருந்து பனிப்பாறைகள் பிரிந்து சென்றன. இதனால் கடல் மட்டம் அதிகரிக்கும் நிலை ஏற்பட்டது. இப்போதும் அது போலவே கடல் மட்டம் அதிகரிக்கலாம் என அஞ்சப்படுகிறது.

உலகம்